शेततळ्याकरीता योग्य जागेची निवड करतांना कठिण, कडक, जिवंत पाण्याचे झरे / उपळणारी जमिन किंवा वाहणाऱ्या पाण्याला अडथळा निर्माण होणारी जागा नसावी. खोलगट भागावर किंवा डोंगराच्या पायथ्याशी अथवा डोंगर कपारीजवळ तसेच पूर्वीची विहीर, तलाव, खड्डा, किंवा दगडखाण बुजवून शेततळे तयार करू नये.

शेततळ्याचे खोदकाम पोकलेन मशिनद्वारे करावे. शेततळे खोदताना प्रथम सपाट जमिनीवरील मऊ मातीचा थर शेततळ्याच्या बाहेरील जागेत ढिग करून साठवावा. शेततळ्याचे बांध बनविताना खोदाई दरम्यान निघणाऱ्या मुरूमाचा वापर करावा. खोदाई दरम्यान निघालेले मोठे दगड, ब्रेकिंग / ब्लास्टिंग करून निघालेले दगड बांध बनविताना वापरू नयेत. मोठमोठे दगड बांधात वापरल्याने दगडामध्ये पोकळी (कॅव्हीटी) राहते व पाणी बाहेरच्या बाजुने बांधामध्ये गेल्याने मुरूम मातीची धुप होते, त्यामुळे बांध खचण्याची दाट शक्यता असते. त्यामुळे शेततळ्यास धोका निर्माण होऊ शकतो. बांध व तळ बनवितांना सर्वात शेवटी मातीचा थर द्यावा व त्याची दबाई (कॉम्पॅक्शन) करावे.

प्रत्यक्ष शेततळ्याच्या आकारमानानुसार जिओमेम्ब्रेनची जोडणी केल्यामुळे अस्तरीकरण एकसमान होते. बांधाच्या उताराच्या बाजूने जिओमेम्ब्रेनला उभे (व्हर्टीकल) जोड केल्याने त्यावर ताण येत नाही. यामुळे जिओमेम्ब्रेनचे आयुष्यमान वाढते.

त्यामध्ये कागद मातीखाली बुजवून घेता येईल. एचडीपीई जिओमेम्ब्रेन बसवितांना ते उडून जाऊ नये म्हणून तळ्याच्या आकारमाना प्रमाणे त्यावर मातीच्या / वाळूच्या गोण्या भरून ठेवाव्यात.

शेततळ्यामध्ये जिओमेम्ब्रेन बसवितांना त्यांचे (जॉईंट) जोड स्वतःच्या निरीक्षणाखाली कुशल कारागिराकडून ठरवून दिलेल्या नियमानुसार अत्याधुनिक मशिनद्वारे तळ्याच्या आकाराप्रमाणे व्यवस्थित जोडावेत.

जिओमेंम्ब्रेन आच्छादन केल्यानंतर त्यात लवकरात लवकर पाणी पुर्ण क्षमतेने भरल्यानंतरच जिओमेंम्ब्रेन भिंतीवरील चरामध्ये मातीने बुजवुन घ्यावे. त्यामुळे भविष्यात उंदरांमुळे होणारा उपद्रव कमी होतो. पाळीव प्राणी/वन्य प्राणी तलावाकडे जावू नये म्हणून तळ्याला कुंपण / जाळी बसविणे गरजेचे आहे.